大律師公會又好，岑子杰又好，劉細良又好，不論係幾咁落後形勢，無可否認，佢地仍然係代表住佢地所代表嘅一堆香港人。批評佢地，絕對可以，但每次見到佢地犯錯就衝出黎冷嘲熱諷呢種心態，真係無補於事。
我對於香港司法獨立嘅睇法，對於香港前途嘅認知，同佢地差天共地，因為我從來都認知到共產黨嘅影響力係無孔不入，話法律界仍然中立係近乎反智。然而，今時今日嘅我，之所以唔會再好似讀緊大學嗰時嘅自己咁樣追住佢地咬，成為所謂分化撚，就係因為我理解到香港已經去到生死關頭，而關乎生命嘅話，忘記咗「只有求同存異至可以一齊生存落去」呢個法則嘅人，就會影響共同體生存。
見到泛民獻醜，見到焦土跡象，見到黃色經濟圈生亂，好多人都眉飛色舞，因為佢地嘅人生，就係靠驗證人性真係好腐爛而維繫，一見到人地活得好，佢地就會唔順眼，就會陷入虛無。不過，我相信人嘅經歷、眼界同思考能力，係會影響人嘅心態，而性格成熟嘅人必然會知道，識得設身處地，識得善待自己人，其實至會令日常生活更加充實，以至令成個民族更有希望。
呢半年以黎，如果香港人係對呢個地方冇感情，係對身邊人嘅傷痛如同中國人一樣冷漠，係缺乏人性善嘅一面，手足之間，唔同崗位之間，根本唔會成就到咁多事，行到選舉過後仍然有八十萬人上街嘅呢一日。我地絕對毋須畀啲掌聲自己，亦唔係要隱惡揚善，但我地一定要記得：喺呢個世界上面，香港人只會減少，唔會再增加，而我地一割，就會少一個人同我地有同樣嘅笑話sense，有同樣嘅宿命感，有同樣嘅悲喜交集。
我唔知劉細良講話，淨係要提時代革命嘅來龍去脈係乜。坦白講，我從來都唔用呢句說話，因為於我而言，反送中只係香港脫華入歐嘅一章，光復過去繼續一國兩制亦非香港應該行嘅路，而我嘅方向，係思考脫離中國之後，香港可以點樣重新成為有影響力嘅民族國家，立足於東亞。然而，彼此政見唔一樣係閒事，只要對方目前係堅持五大訴求，缺一不可，只要對方肯聽都係香港人嘅我嘅睇法，我都會肯講，而講嘅時候，亦唔會以一種「你到而家重未明個世界係點囉」嘅態度去講，因為民主嘅精神，就係啟蒙同期待人會進步，扼殺他人達致human flourishing moment嘅機會，就係唔明白民主精神。
基本上，凡係講民族或者人有劣根性嘅人，都係冇諗過自己就係劣根源頭嘅人。認定中國人無可救藥，我都理解而且認同，但認定自己人無可救藥，不停攻擊，到底有乜價值？自己用緊個有色眼鏡去睇世界，自然睇乜都有色，察覺唔到身邊有其他人係用其他眼光睇呢個世界。呢啲講法係顯得左膠，但同時又有邊個可以反對人類同文化嘅可塑性？文化相對主義，正有自我反省之用，可以提醒自己精進自身，唔好太急於將世界嘅問題簡化，以免遠離更準確嘅結論，用得其所，學識真誠聆聽他人意見，就會令我地距離民主更近。
民族發明並非虛假之物，因為人類正係依靠製造社會事實而繁榮，而想像可以超越物質。人與人之間嘅交流係有愛，個體就會將呢種善性投射去未必相識嘅其他人，繼而令民族想像具體而真實。呢張圖所彰顯嘅係一種非常好嘅心態，要避免運動半途而廢，要避免香港成為中國解體犧牲品，我地要做嘅，就係接受自己人嘅唔完美，然後提醒，然後再一齊行落去。
Search